الستات غلبانة وقعدتها مع باباها احسن لها ميت مره

مع بابا .. دخلتى المطبخ ما دخلتيش .. كله واحد وممكن باباكى يساعدك
انما مع جوزك ..مش بمزاجك .. ها تدخلى .. هاتدخلى

مع بابا .. فى العيد بيديلك العيديه وفوقيها بوسه ..
لكن مع جوزك .. بيقول انت خلاص كبرتى على الحاجات دى

مع بابا. بتنامى وتصحى وقت ما انتى عايزه ..
مع جوزك .. وقت ماهو عايز .. او مع مواعيد شغله.

مع بابا ا.. بتشترى هدومك ومكياجك وكل اللى انتى عايزاه .. ويقولك حلو قوى عليكى
مع جوزك .. بيشترى لك برضه .. لكن ما قل ودل .. ويقولك .. فلوووووووووووووووووسى والمرتب

مع بابا لو حصل حاجه مثلا و كنتى زعلانه .. بيزعل عشانك ..
مع جوزك .. بيزعل منك .. ويلومك ازاى تزعلى اصلا

باباكى .. كلمه حلوه ترضيه ..
وجوزك .. طول الليل تحايلى فيه

باباكى وانتى عيانه .. سهران جنبك طول اليوم
انما جوزك بيروح ينام فى الاوضه التانيه.

بابا .. لما تدلعى عليه .. بيفرح بيكى
انما جوزك .. بيقولك ..اكيد عايزه حاجه

باباكى.. لما تقولى له .. ده حصل كذا وكذا .. بيهتم ويصدقك
انما جوزك .. بيقولك .. الموضوع دا وراه ان .. ويشك فى كلامك

بابا .. لو شافك بتعيطى ها يمسح دمعتك
انما جوزك .. ها يقولك يادى النكد

مع بابا .. لو حاطه ماكياج فاقع شويه.. ها يقول لك الهادى عليكى احلى .. وانت احلى من غيره خالص
لكن جوزك .. ها يقولك شكلك زى عروسة المولد

مع بابا .. لو طلبتى دوا من الصيدليه . جرى ها ينزل يجيبه
لكن جوزك ها يسالك بكام الأول؟

بابا .. لو طلب منك كوباية ميه .. بيقولك لو سمحتى عايز ميه
انما الباشا يقولك قومى هاتى ميه

لو بتتفرجى مع بابا على التليفزيون ... ها يسيب لك الحريه تتفرجى على اللى انتى عايزاه
لكن المحروس .. مافيش قدامك غير يا الاخبار يا الكوره .. يا ميلودى

بابا لو نازل مشوار .. بيعمل ليكى اعتبار ويديكى خبر
لكن جوزك .. بيختلس عدم وجودك قدامه عشان ينزل من وراكى ولو قفشتيه يقولك انا نازل ويقفل البابا بسرعه

لو محتاجه فلوس فى حاله طارئه .. بابا ها يديكى من عينيه
لكن جوزك .. ها يقولك خدى من بابا

لو جالك مكالمه غلط على موبايلك.. بابا ها يقولك حصل خير
لكن جوزك .. ها يتهمك بالخيانه ...

لو ما فيش فى التلاجه غير ازازة بيبسى واحده ..بابا ها يسيبها لك بنفس راضيه
لكن جوزك ها يقول معلش انا لازم ابلع او ها يقسمها معاكى

لو اتزحلقتى على الارض ..باباكى ها يجرى يشيلك
جوزك ها يقعد يضحك ويقولك ما انتى اللى مش منشفه الارض كويس

لو نفسك تغيرى مكان السجاده ..باباكى ها يقوللك عنك دى تقيله عليكى
لكن جوزك ها يقولك مش ضرورى وجع القلب دا

لو العربيه عطلت بيكى .. بابا.. ها يقولك اقفليها وتعالى وانا ها اتصرف
جوزك .. ها يقولك متركبيش العربيه تانى

لو حكيتى ل بابا على واحد عاكسك .. ها يقولك معلش .. وبعدين عنده حق . مانتى جميله
انما جوزك .. ها يقولك انتى اللى ماشيه مش محترمه

لو مقدمه على شغل ..باباكى.. ها يوصى عليكى طوب الارض
لكن جوزك .. مش ها يتعب نفسه ولا يهمه اصلا وها يقولك يعنى انتى ها تشتغلى وزيره

باباكى لو لاحظ انك متخانقه مع اختك .. ها يصالحكوا على بعض
لكن جوك هيقولك خليهم يولعوا دول عيله عجب

مهما باباكى كان متضايق .. لا يمكن تكلميه وتلاقيه مكشر
لكن جوزك.. لو متضايق .. مصر كلها هتنكد عليكي استحملى بقى

انا بالنسبالى شايفة ان الاتنين واحد ومش فارقة كتير خالص بس يمكن تفرق مع غيرى

الحب مش بالعافية

مشهد نهار ليلى داخلى خارجى وزووووووووووووووم ان على رجل امينة ونطلع بالزوم لفووووووووووووق لحد عينيها -

اهئ اهئ اهئ--

الخاين الغشاش

مالك بس يا أوم أوم بتبكى ليه

عاااااااااااااااااااااااااااااااااااااا الخاين الغشاش .. باعنى هجرنى دبحنى قتلنى

هو مين ه بس يابت انتى

حسوووووووووووووووونة...عااااااااااااااااااااااااااااااااااااااااا

حسونة مين يابت

عااااااااااااااااااااااااااااااااااااااااااا.. الحقينى يا ماما محتاجة لحضنك وحنانك انا قلبى بقى بروكن يامامتى..عاااااااااااااااااااااااااا

يابت اقفلى السرينة دى بس وقوليلى نيل ايه المتعوس على خيبته ده

خطب فهيمة بنت ام فهيمة اللى بتبيع بسلة على اول شارعنا ياماما ..عااااااااااااااااااااااااااااااااااااااااا

طب وفيها ايه بس.. هو يابت وعدك بحاجة؟

لا يا ماما عاااااااااااااااااااااااااااااااااااااا

يكونش عمل معاكى حاجة يابت؟

لا ياماما.. عااااااااااااااااااااااااااااااااااااا

امال نليك ايه المقصوف على شبابه عشان يخونك ويتجوز غيرك؟

ما المصيبة انه ما نيل يا ماما ...عااااااااااااااااااااااااااااااا..الخاين الخاين

طب يابت كان بيشاولك..بيلمحلك..بيتغمزلك؟؟؟؟؟؟؟

لا لا لا لا يا ماما ..عااااااااااااااااااااااااااااااااااا

امال يبقى خاين ازاى..هو الحب بالعافية يابت ولا ايه؟؟؟؟؟

*****************************

مشهد ليلى نهارى خارجى داخلى وزووووووووووووووووم ان على رجل امينة وبنطلع بيه لفووووووووق لحد سماعة التليفون

الووووووووو..الحقينى يا فتكات انا فى مصيبة..عااااااااااااااااااااااا

مالك يا أوم أوم ياحبيبتشى فى ايه خديتشينى يامنيلة مالك

حسووووووووووووووونة..عاااااااااااااااااااااا..الخاين عاااااااااااااااااااااااا

ماله عمل ايه؟

خطب البت فهيمة بنت ام فهيمة بتاعة البسلة اللى على اول شارعنا

طب انتى زعلانة ليه؟

بحبه يا فوتكا ..عاااااااااااااااااااااا

يالهوى ومن غير ما اعرف حبيتوا بعض امتى بقى؟

لا انا بس اللى بحبه هو مبيحبنيش .. عااااااااااااااااا

يعنى لعب بيكى المدهول على عينه

ياريته لعب ..عااااااااااااااااااااا .. ده ماقامش من دكة الاحتياطى ويوم مالعب جاب جون عند غيرى ..عاااااااااااااااااااااااا

طب سد سد .. امال يبقى خاين ازاى بقىىىىىىىىىى ؟

خانى يافوتكا ..ما حبنيش زى ما انا حبيته..عاااااااااااااااااااااااااااا .. بحبه يافوتكا .. عااااااااااااااااااااااااااااااا

يالهوى يابت.سدى السرينة دى ماهو الحب مش بالعافية اصله

عااااااااااااااااااااااااااااااااااااااااااااااااااااااااااااااااااااااا

****************************

مش كده وبس اللى حصل

لاااااااااااااااااااااااااااااااااااااااااااااااااااااااا

دى الانسة المصونة أوم أ,م عملت زوووووووووووووووووووووم ان على كل اهل الحتة

والكل بقى يتناقل الكلام على الاخر المصون حسونة

وكل واحد بقى يحط تحابيشه

وبقى فى قصص وحكايا عن العلاقة الغرانية اللى كانت بتربط بين امينة وحسون

ده غير القيل والقالوانتهت الحكاية بان حسونة بقت سمعته فى الحضيض وجت الانسة المبجلة فهمية هى وامها السيدة ام فهيمة

وفى وسط الحتة كلها والشارع والمنطقة بعد ما سمعته بقت منيلة

رمتله دبلته وشبكته بعد ما فرجت عليه اهل حتته

اكيييييييييييييد طبعا خافت ليعمل فى بنتها زى ماعمل فى امينة

مع انه ولا عمل ولا سوى

وفى الاخر لا امين اتجوزته ولا هو اتجوز فهيمة

وفى ناس بتقول انه انتحر وناس بتقول انه هاجر

بقى ده حب ياعالم

كتير ناس بتحب

بس مش كل حب زى التانى

امتى تكون بتحب اوى بس ما تقدرش تقول لحبيبك انك بتحبه

عشان بتحبه؟

ان ان انننننننننننن تشششششششششش

سوسو : الحقينى يا توتو مودى دلقنى ياتوتو
توتو : ايه بتقولى ايه دلقك يعنى ايه
سوسو: اهئ اهئ الخاين الغشاش بعد ما حبيته وضحيت علشانه بكل حاجة جاى فى الاخر يقولى سورى مش هقدر اظلمك معايا انتى تستاهلى واحد احسن منى بكتير
توتو: المنيل على عينه ايه البجاحة دى
سوسو: الندل ماطمرش فيه تضحياتى وحبى ليه ، خلاص بكل سهولة نسى يوم مابعت الموبايل ابو كاميرا عشان يدفع الكفالة يوم مااتقبض عليه بيحشش فى عربية فرفور صاحبه
ولا نسى يوم ما اتنازلت عن الشوبنج بتاع يوم الجمعة اللى قبل اللى فاتت عشان خاطر اعزمه عل سنيما واغديه فسيخ ورنجة فى حديقة الاسماك
ااااااااااااااااااااااااااااااااه ياتوتو ااااااااااااااه
وبعد 5 شهور

توتو: ايه ياسوسو د هانا سمعت انك اتخطبتى
سوسو : اه فعلا ياتوتو اتخطبت لميزو ابن طنط توحة بنت طنط شريهان جارة طنط دوسة خالتى
توتو: ازاى عملتى كده وانتى لسة بتحبى المخفى على عينه اللى اسمه مودى
سوسو: ماهو لازم اعمل كده عشان انسى ياتوتو ده ان عرفت انسى
توتو: وتنسى ازاى انتى كده هتخدعيه
سوسو: لا انا مش هخدعه ولا هخونه ولا الكلام اللى بتقوليه ده كله هو بيحبنى وهو اكيد هيعوضنى عن حب مودى ده حتى شكله فى كل حاجة حتى بيفطر طعمية وفول كل اليوم الصبح زى مودى بالظببببببببط
توتو: انتى دماغك حجر........مبروك

بعد سنة
لولولولولولولولى ...الف مبروك ياعروسة .....الف مبروك ياعريس
ميزو: اخيرا ياروحى بقينا لوحدنا انا بجد مش مصدق عينيا ..احنا بجد بقينا فى بيت واحد مع بعض مش هنفترق ابدا
سوسو: (صورة مودى ادام عنيها) انا كمان ياحبيبى مش قادرة اصدق ابدا اننا بقينا لوحدنا
تانى يوم
ميزو راح يصحى سوسو
ميزو: سوسو..سوسو ياحبيبتى اصحى.. صباحية مباركة ياعروسة
سوسو: (وهى بتتمطع) صباح النور ..الله يبارك فيك يا (مودى ياحبيبى)
ان ان انننننننننننننننننننن تشششششششششششششش

نرجع تانى لاستوديو الجد ونسأل


فكرت تكون انت الراجل التانى فى حياة زوجة المستقبل؟
او
فكرتى انك تكونى انتى الحبيبة رقم 2 فى حياة زوج المستقبل؟
هتقبلوها؟
ولو قبلتوها
لحد امتى هتقدر تستحمل ان حبيبك يفكر فى غيرك
انت متخيل ازاى حبيبك يكون شايفك حد تانى
بيعاملك على انك حد تانى
بيقارنك بحد تانى
دلوقتى حط نفسك مكان زوج او زوجة المستقبل
لو انت مابترضاش الظلم لنفسك
هترضاه لحبيبك بعد كده
ولا هترضى عايش حياة مفككة الحب بتبعده بايدك مع انه ممكن يكون موجود
الاسرة الجميلة الصغيرة اللى بتحلم بيها
الزوج او الزوجة اللى تحبك وتخلص لك
والزوج اللى بيحمى وصاحب القلب الحنين
والاطفال اللى لازم يتربوا ويعيشوا فى جو كله حب
ماتكسرش قلبك بايدك وتحطمه عشان شئ عدى وولى وانتهى
خليك دايما فاكر ان كل نهاية بداية
ونهاية قصة حب فاشلة قصة حب انجح لانك ببساطة هتتفادى اخطاءك القديمة وهتفهم اللى ادامك اكتر
لو قررت انك تعيش يبقى لازم ترمى اللى فات ورا ضهرك وتعيش من جديد عشان تحقق حلم اتمنيته
يمكن حلمك ماكانش هيتحقق مع قلب جرحك او سابك او فارقك لاى سبب من الاسباب
بس هيتحقق مع حد تانى رنا بس اللى عارفه
استناه هيجيلك لانه ببساطة نصيبك
والنصيب بايد ربنا محدش بيقدر يغيره
لكن نقدر نسعى لانه يكون اجمل واجمل

i want to spend my life with u

احم احم
اول مشكلة هنتكلم فيها
مقسومة لشقين وحاجة كده على الهامش
اول شق
هو كلام اتقالى من خلال فضفضة احد مرتادى المدونة
طبعا انا عارفة انى هخرج بخساير صحية من المدونة دى

بس كله فداكوا

المهم نلاقى حل للى بيحصل ده

اقروا وركزوا معايا وابقوا قولولى رايكوا وبصراحة

انا : انت كلمتها فى ارتباط بس ولا جواز؟
هو : جواز لا بس اكيد قولتلها انى عايز اكمل عمرى معاها
هو : لو هى طلبت انا مكنتش هرفض
انا : وهو المفروض مين اللى يطلب الجواز من مين
هو : بس حسيت انه بدرى شوية لانه يدوب لسة متخرجين من الجامعة
هو تانى: هههههههههههههههههههههههه
انا : طيب هى كده اكيد فكرت انك بتتسلى
هو: انا مش عارف بس انا ماقلتلهاش انى عايز اتجوزها
هو : انا قلتلها انى عايز اكمل عمرى كله معاها
هو : انما الجواز ده سايبلها فيه القرار (المفروض هى اللى تطلبه للجواز يعنى)
انا : بس انت ماطلبتش منها ده عشان تقرر
انا : وبعدين معنى كلامك ده معناه انك عايز ارتباط والكلام ده بيتقال عادى دلوقتى
انما المفروض طلب الجواز يكون صريح كده المفهوم بتاع كلامك انك عايز ترتبط ويااما تتجوزها يااما لا
هو : والله َ!!!!!
انا : والله
هو : عجيب كلامك
انا : ليه عجيب
هو: تعرفى انا قلت عايز اكمل عمرى كله معاها لانها اقوى من الجواز
هو : لان اللى بيتجوز ممكن يطلق
هو: بس انا بحبها ومستحيل اسيبها يوم واحد
انا : يعنى مالوش لازمة انك تقولها ان فى نيتك الجواز بدل كده اقوى؟
هو : مش قصدى
هو: بس اللى قلته معناه انى عايز اتجوزها
انا : البنت مش هتاخد باللى فى نيتك اكي
انا : اكيد هتاخد بكلامك

ده الكلام اللى اتقالى عشان مااكونش فهمت غلط ولا حاجة

وردى عليه كمان
طبعا كان من بقية الحوار باين اوى ا نفى حاجة غلط
بس انا نفسى افهم
ايه معنى الكلام ده
هى للدرجة دى المفروض البنت تدخل جوة نية الراجل وتعرف اللى جواه من كلامه
ازاى بنت تروح تقول لواحد نتجوز
طبعا لو هى بنت محترمة مش هتطلب منه جواز وهتحافظ على كرامتها وتسيبه
ولو واحدة تانية كملت معاه اكيد اكيد فى الاخر هيقولها انا ماوعدتكيش بحاجة
والنبى ياجماعة قولولى لو انا شايفة حاجة غلط وللا انا بفهم على ادى ولا ايه بالظبط
نا عايزة رايكوا وعايزة مناقشة سخنة بين كل زوار المدونة يشوفولى
ايه موضوع ان عايز اكمل بقية عمرى معاكى ده اقوى من طلب الجواز
وان المفروض البنت هى اللى تقوله نتجوز
ياقووووووووووووووووووووووم اغيثونىىىىىىىىىىىىىى
قولولى العيب من مين
******************************
الحلقة الجاية مع ازاى تقدر تنسى حبيبك او اللى المفروض انه كان حبيبك

استعدوا

البداية

حكيم روحانى حضرتك

اهممممممم عشان تحرمى تاكلى جلاس.. وتدوبى فى قلوب الناس

قعدت فترة افكر فى اسم للمدونة
مالقتش احسن من حكيم روحانى حضرتك
والسبب ببساطة انى بحب الفيلم ده
كمان هو طق فى دماغى زى ماكل حاجة بتطق
وبعدين المدونة والتدوينات هتبقى عاطفية
بتتكلم عن الحب ومشاكل الحب واللى بيجرى فى الحب
كمان هنناقش المشكلات العاطفية اللى بتقابلنا فى الحياة
واللى عنده مشكلة عاطفية ممكن نساعده فى حلها
يمكن ربنا يردهالنا فى المستقبل ان شاء الله
ماهو على راى المثل
باب النجار مخلع
نفضل نحل مشاكل الناس واحنا ايدنا على خدنا مش لاقيين مشاكل عاتفية نحلها لنفسنا
بس انا شخصيا متفاءلة
وربنا مايجيب مشاكل
بس اهه كله توعية لغيرنا اللى خبرتهم قليلة فى الحب
وفى معرفة معادن الناس
ده غير ان الحب بيعمى فلازم احنا نكون نضارة الحبيب على حبيبه
عشان يشوف عيوبه قبل مميزاته

لالالالالالالالالالا
احنا مش هنخرب بيوت
احنا بس هنحاول نحلها
ونجيب درفها
قصدى نجيب الحل على طبق من فضة
والشبكة على طبق من دهب
وربنا يتمم بخير

للتواصل ده ميل المدونة

sarah_eleskafy@yahoo.com

اللى عنده مشكلة وعايزنا نساعده

او موضوع يهمه اننا نناقشه يبعتلى