2/24/08

الستات غلبانة وقعدتها مع باباها احسن لها ميت مره


مع بابا .. دخلتى المطبخ ما دخلتيش .. كله واحد وممكن باباكى يساعدك
انما مع جوزك ..مش بمزاجك .. ها تدخلى .. هاتدخلى

مع بابا .. فى العيد بيديلك العيديه وفوقيها بوسه ..
لكن مع جوزك .. بيقول انت خلاص كبرتى على الحاجات دى

مع بابا. بتنامى وتصحى وقت ما انتى عايزه ..
مع جوزك .. وقت ماهو عايز .. او مع مواعيد شغله.

مع بابا ا.. بتشترى هدومك ومكياجك وكل اللى انتى عايزاه .. ويقولك حلو قوى عليكى
مع جوزك .. بيشترى لك برضه .. لكن ما قل ودل .. ويقولك .. فلوووووووووووووووووسى والمرتب

مع بابا
لو حصل حاجه مثلا و كنتى زعلانه .. بيزعل عشانك ..
مع جوزك .. بيزعل منك .. ويلومك ازاى تزعلى اصلا


باباكى .. كلمه حلوه ترضيه ..
وجوزك .. طول الليل تحايلى فيه

باباكى وانتى عيانه .. سهران جنبك طول اليوم
انما
جوزك بيروح ينام فى الاوضه التانيه.

بابا .. لما تدلعى عليه .. بيفرح بيكى
ا
نما جوزك .. بيقولك ..اكيد عايزه حاجه

باباكى.. لما تقولى له .. ده حصل كذا وكذا .. بيهتم ويصدقك
انما
جوزك .. بيقولك .. الموضوع دا وراه ان .. ويشك فى كلامك

بابا .. لو شافك بتعيطى ها يمسح دمعتك
انما
جوزك .. ها يقولك يادى النكد

مع
بابا .. لو حاطه ماكياج فاقع شويه.. ها يقول لك الهادى عليكى احلى .. وانت احلى من غيره خالص
لكن جوزك .. ها يقولك شكلك زى عروسة المولد

مع
بابا .. لو طلبتى دوا من الصيدليه . جرى ها ينزل يجيبه
لكن
جوزك ها يسالك بكام الأول؟

بابا ..
لو طلب منك كوباية ميه .. بيقولك لو سمحتى عايز ميه
انما
الباشا يقولك قومى هاتى ميه

لو بتتفرجى مع بابا على التليفزيون ... ها يسيب لك الحريه تتفرجى على اللى انتى عايزاه
لكن المحروس .. مافيش قدامك غير يا الاخبار يا الكوره .. يا ميلودى

بابا لو نازل مشوار .. بيعمل ليكى اعتبار ويديكى خبر
لكن جوزك .. بيختلس عدم وجودك قدامه عشان ينزل من وراكى ولو قفشتيه يقولك انا نازل ويقفل البابا بسرعه

لو محتاجه فلوس فى حاله طارئه .. بابا ها يديكى من عينيه
لكن جوزك .. ها يقولك خدى من بابا

لو جالك مكالمه غلط على موبايلك.. بابا ها يقولك حصل خير
لكن جوزك .. ها يتهمك بالخيانه ...

لو ما فيش فى التلاجه غير ازازة بيبسى واحده ..بابا ها يسيبها لك بنفس راضيه
لكن جوزك ها يقول معلش انا لازم ابلع او ها يقسمها معاكى

لو اتزحلقتى على الارض ..باباكى ها يجرى يشيلك
جوزك ها يقعد يضحك ويقولك ما انتى اللى مش منشفه الارض كويس

لو نفسك تغيرى مكان السجاده ..باباكى ها يقوللك عنك دى تقيله عليكى
لكن جوزك ها يقولك مش ضرورى وجع القلب دا

لو العربيه عطلت بيكى .. بابا.. ها يقولك اقفليها وتعالى وانا ها اتصرف
جوزك .. ها يقولك متركبيش العربيه تانى

لو حكيتى ل بابا على واحد عاكسك .. ها يقولك معلش .. وبعدين عنده حق . مانتى جميله
انما جوزك .. ها يقولك انتى اللى ماشيه مش محترمه

لو مقدمه على شغل ..باباكى.. ها يوصى عليكى طوب الارض
لكن جوزك .. مش ها يتعب نفسه ولا يهمه اصلا وها يقولك يعنى انتى ها تشتغلى وزيره

باباكى لو لاحظ انك متخانقه مع اختك .. ها يصالحكوا على بعض
لكن جوك هيقولك خليهم يولعوا دول عيله عجب

مهما باباكى كان متضايق .. لا يمكن تكلميه وتلاقيه مكشر
لكن جوزك.. لو متضايق .. مصر كلها هتنكد عليكي استحملى
بقى

انا بالنسبالى شايفة ان الاتنين واحد ومش فارقة كتير خالص بس يمكن تفرق مع غيرى

12 comments:

فراشة said...

هاي
عجبتنى المدونة جداً
بس حسيت كده انك كارهه الجواز ومتعقده زينا كلنا انا مش بقول ان ده حاجه غريبه بس لو دى الصورة اللي انتى شايفاها مكن تحصلك لما تتجوزى او لو كنتى متجوزة من راجل بالشكل ده يبقي العيب في الراجل ده نفسه مش في الجواز
ومتلوميش غير نفسك لو اتجوزتى راجل زى ده
وربنا يوفقك وتلاقي انسان كويس يبقي زى بابا
باي
صاحبة مدونة يوميات موظفة استقبال
http://receptionist-daily.blogspot.com/

ragabhpl said...

بصراحه انا من رايى ان سواء البنت او الرجل
بيرتاح فى الزواج اكتر من قبل الزواج
يكفى ان كل المشاكل العاطفيه والنفسيه بتتحل
ويكفى ان الواحد بيلقى حد يفضفض له على اللى جواه او يترمى فى حضنه لو مش لاقى حد يفهمه
وانا عارف ان رايك فى الجواز او قبله على الحياد
بس اناحبيت اوضح وجهة نظرى
سلام

only spot said...

سلام عليكم
لكل قاعده شواذ معتقدش كل الاباهات ملايكه وبرضه معتقدش كل الازواج عايزين طخ النار عامة هو بيبقى نصيب فى الاول والاخر
خالص تحياتى

موناليزا said...

يعنى ايه الاتنين واحد؟
الزوج زوج
والاب اب

رئيس جمهوريه نفسى said...

هو مش كل اب كده ومش كل زوج كده ممكن تلاقى زوج بيملك حنيه الاب واب بيملك قسوه ابليس
بس الفرق بين الزوج والزوج الاخر مدى حبه لزوجته ومدى التوافق بينهم

tarek alghnam said...

والله باب والزوج كان الله فى عونهم
كا ماادخل مدونة بنت الاقيهم نزلين فى الرجالة ومحدش عاجبهم
والله حرام حتى العيد اللى بيتعمل عيد الام حتى الرجالة منسيين فى الاعياد
بس اقولك اية بوست رائع استمتعت بية
وسعيد انى هنا واتمنى التواصل معك

رؤية said...

هههههههههه
حاجة تعقد
بس دمها خفيف
سعيدة بمعرفة مدونتك
تحياتى لك.

Anonymous said...

howa enty leeeh bet7eeby el regala awy keda ma sha2 ALLAH :P...nice writings (^_^)

سهر الليالي said...

اسلوبك حلو اوي
والمدونه جميله
وكلامك في نوع من الحقيقه نوعا
بس انتي مكبرها شويه
الجوزا مش وحش اوي كدا
اكيد زي ما فيه عيوبه في اللي بيميزه

مستنيه جديدك
تحياتي واحترامي لشخصك
فراشه الشتاء

السينيور said...

ممكن كلامك يكون حقيقي في بعض الاحيان لكن مش قاعده
ثم ان طريقة كلامك السلبية عن الاختلاف بين الاب والزوج مش متكافئة اصلا
ده حاجة وده حاجة تانية خالص
ثم ان الزواج سكن ورحمة ومحبة ووفاء واخلاص وحب وتضحية
وميثاق غليظ يشهد عليه الله عز وجل
ومعاني كتير اوي غايبة عننا
لكن للاسف احنا اللى بنحولة لجحيم وفي ايدنا اننا نحولة لجنه

Anonymous said...
This comment has been removed by a blog administrator.
Anonymous said...
This comment has been removed by a blog administrator.